17.10.2012

2012-ci il oktyabrın 16-da Azərbaycan Basketbol Federasiyasının iqamətqahında Məşqçilər Şurasının iclası keçirilmişdir.

ABF prezidenti N.Nəsibovun sədrliyi ilə keçirilən iclasda əsasən uşaq-yeniyetmələrlə çalışan məşqçilərin problemləri müzakirə edilmişdi. Bununla bağlı məşqçilər şurasının sədri Elxan Əliyev yeniyetmələrlə təlim-məşq prosesinin təkmilləşdirilməsinin və perspektivli basketbolçuların seleksiyasının daha səmərəli aparılmasının vacibliyini qeyd etdi. Daha sonra müxtəlif idman təşkilatlarını (UGİM və klublar) təmsil edən məşqçilər uşaq-yeniyetmə basketbolunda mövcüd olan problemlər haqqında fikir mübadiləsi apardılar.

Yekunda ABF-nın baş katibi Qəhrəman Məmmədyarovun oktyabrın 9-da keçirilən Rəyasət Heyətində U14 yığmasına Tahir Baxşıyevin baş məşqçi təyin edilməsi təklifinə baxıldı. İclasa sədrlik edən ABF-in prezidenti N.Nəsibov baş katibin təklifini dəstəkləyərək bu işdə basketbolsevər biznesmen Bəhrəm Abdinovun fəaliyyətini təqdirə layıq saydı.

Sonda toplantı iştirakçıları T.Baxşıyevin U14 yığmasının baş məşqçisi vəzifəsinə təyin edilməsinə yekdilliklə səs verdilər.